榴槤肉餅飯? !芒果肉餅飯?!超好食嘅隱世肉餅專門店

話說前排小編喺觀塘放工,比個住屯門嘅同事夾左去元朗嗰邊陪食野(小編為東九龍人T_____T),好啦,坐左成粒幾鐘私家車終於到左呢間食肉餅嘅地方啦。 呢個位於元朗屏山塘坊村嘅肉餅專門店「屏山老地方」,原來係一個好出名嘅餐廳,好多名人都黎過呢間鋪頭食過野,小編望一望個餐牌,What!!榴槤肉餅飯? !芒果肉餅飯?!夏威夷脆果仁煎肉餅?!薑蔥蠔豉煎肉餅?!佢個肉餅餐牌真係好長好長,越睇越奇怪,全部大纜都扯唔埋喎! 小編本來想簡個穩穩陣陣嘅黑椒肉餅食下,但諗諗下,唔係喎!!我山長水遠比人賣豬仔咁運過黎,點都要試下D特色野嘅!所以小編最後就簡左中規中矩嘅芒果肉餅飯啦~ 芒果煎肉餅飯 $58 等左一段仔時間,我個芒果肉餅飯終於到啦!肉餅嘅兩邊煎得好香,肉餅好厚賣相唔錯!切開手掌甘大嘅肉餅,大大嘅芒果就夾左喺肉餅中間。望同聞都幾好啦!唔知味道如何呢?所謂「唔食唔知時運到,唔伏唔知身體好」!小編挑大佬啦! 一咬落去!哇!好Juicy啊!點解「芒果+肉餅』呢個聽落咁伏嘅組合會有種咁嘅感覺嘅!芒果甜而不膩,果塊煎香左又厚底嘅肉餅又鎖住晒D肉汁,咬落去兩者嘅香味融合為一,成個配搭真幾特別,係特別好食啊!春風玉露一相逢,更勝卻人間無數,佢一野就超越左小編最愛嘅咸蛋雞蛋肉餅飯!!! 小編平日都真係唔食太多野,唔知係咪塊芒果作反,令到小編胃口大增,食晒不突止,仲想encore 打包個返屋企比娘親同自己兼聽日番工叮黎食!(都叫係出長水遠入黎啊,緊係唔蝕底啦!) 裹面仲有得意又奇怪嘅肉餅架,經過個芒果肉餅飯之後,小編都對其他肉餅信心大增,下次真係試試佢個榴槤肉餅飯先! PS !!!!
美中不足真係地方有D僻,話就話元朗,但實情係近天水圍西鐵站多D,等咩啊!快D組隊試下佢啦!! 店鋪: 屏山老地方 地址 : 元朗屏山屏廈路塘坊村32-33號地下 開放時間: 8:00 - 21: 00 電話號碼 23043288