기생충 (Parasite/上流寄生族) - 誰是寄生蟲?

無劇透部分:
1.作為奉俊昊導演回歸韓國本土題材嘅電影已經令影迷萬分期待,而康城影展首映後口碑載道,加上係首套韓片奪得金棕櫚獎,香港發行商自然打鐵趁熱火速上映。
.
如果你係真。文青又或因為套戲攞獎而慕名而來,可能睇完會有啲落差。『上流寄生族』係完美極致嘅韓式類型商業片,能平衡商業同藝術元素,而劇情峰迴路轉觀眾難以想像!
.
題材針對社會現況亦係一個講親情嘅故事,由開頭充滿黑色幽默、漸漸變成懸疑血腥又帶點悲情。唔會話曲高和寡睇唔明,同時又有啲空間畀觀眾思考。
.
上半年睇咗接近廿套韓片,呢套係我本年度最推薦嘅作品!
-
下列內容討論電影細節,將會嚴重劇透!請先行觀看電影方繼續閱讀!
-
2.康城影展上映時有影評人將電影同『小偷家族』相提並論,但電影深層次討論嘅話題係同『燃燒烈愛/Burning』不謀而合 - 嚴重貧富差距。
.
戲中貧窮家庭為咗生存不惜一切「寄生」富貴家庭,而富貴家庭生活期間不自覺地踐踏貧窮家庭嘅尊嚴。到底邊個先係真正嘅社會寄生蟲?
.
低下階層拼命擺脫貧窮宿命、上流社會盡情品味生活,兩者諗法都無問題,問題在於大家嘅價值觀上。
.
窮人覺得有錢人「因為有錢先至係好人」、有錢人唾棄窮人氣味,不知民間疾苦。
-
3.儘管窮人受到有錢人嘅歧視,當佢哋自己處於優勢時並無逆地而處,反而係選擇剝削比自己差嘅人。
.
由片首宋康昊食發霉麵包彈走昆蟲、Pizza店老細hea爆態度招呼佢哋、撥水趕走隨地小便嘅流浪漢、到中段揭開秘密高潮兩個窮人家庭互相剝削對方,充分展示同體驗人嘅劣根性。
-
4.睇到上流社會「大難臨頭各自飛」,完全冇諗過幫助自己家人,令宋康昊對佢哋反感,而動殺機嘅原因一直鋪咗好耐 - 階級歧視。
.
電影用氣味嚟分開兩個階層,並加以具體嘅例子講述較為空泛嘅概念。
.
或者窮人對呢種氣味習以為常,所以每當宋康昊聽到相關批評,不自覺聞身上衣服但又唔覺得有任何異樣。但有錢人平時根本冇機會接觸到窮人,先至會咁敏感。
.
派對當日李善均夫妻都以嫌棄眼神同用手遮掩鼻嚟表示厭惡,將宋康昊瘋癲嘅情緒推到極端。
-
5.除咗氣味,電影一直透過分鏡、場景以至道具強調「上下/光暗之分」。貧窮家庭住喺韓國獨特嘅半地下室、富貴家族住喺高尚山坡社區,透過兩者地勢暗示貧窮家庭嘗試高攀「妄想成為」富貴家族。
.
暴雨三人趕返屋企時不斷往下走,視覺上將佢哋比喻成乞人憎嘅曱甴,一場大雨將佢哋趕出去。
.
細心睇嘅朋友相信都會發現戲中都有好多唔少鏡頭刻意用上呢個「上下」安排,例如一開始低炒崔宇植喺樓梯底望高同曹汝貞傾計,強烈分開兩人地位。
.
當李善均夫妻瞓喺梳化、而宋康昊三人喺茶几底寸步難移,又係用咗「上下」嚟突出兩個家庭嘅差別。
-
6.人對未來有遐想先會計劃,渴望自己掌控一切,但往往所有事都未如理想。就算全家成功實行「寄生」計劃,以不同身份賺取金錢,可惜被意外打亂如意算盤。
.
戲中宋康昊不斷強調「有計劃」,但原來發現無計劃先係最好嘅計劃。
.
「沒有期待就沒有失望」。
.
面對最後困局,主角設定「長遠簡單但機會率極微」嘅計劃,為充滿黑色幽默而峰迴路轉嘅電影畫上一個悲涼嘅結局。
-
7.窮人家庭對於朴敘俊贈送嘅石頭擺設以為係能夠催谷財運,但中段石頭對於崔宇植嚟講,係反映咗佢內心嘅恐懼。
.
覺得同富貴家庭格格不入,對傷害另一個家庭感到歉疚,最重要係認為自己搞到全家陷入困境⋯⋯
.
將石頭放落河既代表放低自己恐懼,亦係某程度代表佢認命。
.
石頭擺設係有錢人嘅玩意,崔宇植曾經奢望自己能夠登上豪門,甚至錯誤以為自己達到呢個層次。石頭放落河後,同其他石頭都大同小異,根本一切都係自作多情諗多咗。
.
人總覺得自己係最獨特,但只係上千上萬石頭嘅其中一塊。
-
기생충 (Parasite/上流寄生族)
導演:奉俊昊
主演:宋康昊、李善均、曹汝貞、崔宇植、朴素丹
香港上映日期:6月20日
預告:https://youtu.be/DNLQPWg22Jc