兩隻老虎 (Two Tigers) - 千絲萬縷寬恕吧

兩隻老虎 (Two Tigers) - 千絲萬縷寬恕吧
‪12月14日 英皇馬鞍山‬
-
相信大家睇到戲名都拗爆頭,到底套戲係咪畀細路睇?同嗰首出名嘅童謠有冇關係呢?事實上電影以黑色幽默方式嚟敘述一個男人嘗試贖罪過程嘅文藝片。
.
葛優飾演嘅張成功人如其名 - 名成利就,係好多人眼中成功嘅榜樣。但成功嘅過程放棄咗好多事情,令佢一直耿耿於懷,所以藉住呢次被綁架嘅機會,利用綁匪余凱旋嚟幫自己贖罪。
.
張成功吩咐嘅三件事情,分別刻劃角色過往愛情、友情以及親情上嘅缺失。因為自我中心,令女朋友承受唔住而離開;因為自私自利,令戰友喪失治療對眼嘅最後機會;因為父親鬱鬱不得志自盡而令佢變得自卑⋯⋯
.
外界睇落佢的確好成功,但佢內裏清楚自己所缺失嘅正正財富同地位唔能夠彌補。有趣嘅係另一位男主角余凱旋正正相反,覺得只要有錢就能夠解決一切問題,而張成功卻狠狠咁摑佢一巴。
.
打呢篇文嘅時候令我聯想起李滄東嘅『薄荷糖』- 兩位主角同樣想重新嚟過,都因為一啲重要政治事件底下而影響咗佢哋一生。
.
趙薇兩段不斷重複嘅台詞幻真幻假,既係戲中戲嘅對白,亦係佢對葛優嘅怨恨。另外幾段對白以及情節不斷重複又重複,貌似編劇好簡單咁copy & paste,其實和應電影其中一項命題 - 「自我救贖」。
.
對過往缺失追悔不及,渴望能夠重新嚟過,但係人生唔係拍戲咁可以嚟多一take,人就係承受呢啲痛苦而成長。
.
有人話其實每個喜劇內裏都係悲劇,而『兩隻老虎』正正係呢種糖衣洋蔥,觀眾一邊笑着呢啲黑色幽默嘅笑位,導演一邊揭開角色嘅痛苦,坦露殘酷地治療觀眾心靈。
.
電影口碑兩極化,我覺得只係觀眾唔識得點樣睇套戲啫。導演、編劇以及電影公司絕對藝高人膽大,夠膽喺大陸搞呢類型題材嘅作品,可惜嘅係目前人民質素未能承受到咁深厚嘅故事。
-
兩隻老虎 (Two Tigers)
導演:李非
主演:葛優、喬杉、趙薇 
香港上映日期:‪12月12日‬
預告:https://youtu.be/mJd_pWuyJjI