單身男女2 (Don't Go Breaking My Heart 2) - 相愛沒有那麼容易

-
1.話說當年喺戲院睇完時,覺得套戲完全唔知做乜,電影評論學會俾埋最佳編劇佢哋時更覺得「吓點解會係咁嘅」。不過半年後搭長途機不斷係咁loop套戲,慢慢㗳真啲先發現原來到電影嘅奧妙之處,所以今日我哋就同大家講吓佢啦。
.
睇呢套戲前大家要明白三樣嘢:『單身男女2』情節上呼應返第一集、韋家輝式思考哲學、以及杜琪峯傳統商業片製作嘅粗疏質素。
-
2.俾十秒時間大家諗吓呢句對白嚟自邊套電影 - 「十個男人九個滾,一個諗緊」。
.
相信大家估唔到呢句咁葉念琛嘅對白竟然出自『單身男女』!睇到杜琪峯同韋家輝努力嘗試融合新一代嘅愛情觀念落自己嘅電影作品,所以得到一個長期用下體思考嘅男主角「地球男」古天樂;窩心到似電視劇嘅完美人物「火星男」吳彥祖。
.
高圓圓周旋喺兩大型男,上一集最終挑選後者作結婚對象,以為畫上完美句號點知韋家輝繼續使出佢當家本領 - 男未婚女未嫁仲有機會掹!
-
3.續集電影往往都會呼應返首集劇情,但配合韋家輝式哲學就將整件事昇華至另一個層次。韋家輝過往嘅影視作品不斷強調重複嘅宿命論 - 由『大時代』丁氏四子搵黑社會揼方家三姊妹落街,最後四子就俾老竇揼返落街;賀歲片『最愛女人購物狂』邵美琪一直都係生女兼且次次都係「周街生」;『盲探』小敏全家人都為愛而不惜一切心狠手辣⋯⋯
.
由上集嘅三角關係轉化成更糾纏不清嘅五角關係;由插曲「愛很簡單」再加埋「沒那麼簡單」暗示錯綜複雜嘅愛情關係並唔係好似上集咁樣,顛覆上集所建構嘅愛情架構;上集吳彥祖因為冇靈感而開始酗酒,今集偏偏就用佢失婚再次飲酒作結。而呢種大膽嘅顛覆正正係韋家輝拿手好戲,正如『世紀之戰』一口氣推翻晒『大時代』嘅劇情咁。
.
但同時亦有啲地方類近上集,好似吳彥祖第一集後段就為咗高圓圓而設計咗座大廈、今集古生為咗搶婚而不惜爬大廈!同時唔少元素亦不斷重複出現,當然唔少得招牌動作貼memo紙啦。
-
4.今集架構上我認為係成功兼極致版嘅『最愛女人購物狂』,除咗因為亂到七彩嘅愛情關係,再加上角色嘅病態去到極致。
.
古生飾演嘅張申然繼續鹹濕到爆,但今集見到佢對舊愛念念不忘,以為自己放得低可以投入另一段感情不過始終都係唔得。而新加入嘅千嬅「楊鴦鴦」比古仔更癲完全執迷好勝,相信燈神八爪魚作逆向操作、自己揸唔掂法拉利依然要揸落去⋯⋯
.
如此瘋癲嘅人物設定,加埋間中超乎現實嘅劇情確實未必讓一般觀眾容易入口。難得咁商業嘅作品可以滲透咁多作者論元素落去,可惜嘅係現時作品被嚴重低估咗。
.
呢套係少有地我睇完之後同日後嘅觀感有咁大反差嘅作品,甚至係好過第一集嘅續集電影。
.
不過大家當然睇咗第一集先啦,了解返三個人嘅愛情關係先再睇返今集,你就會發覺韋家輝有幾咁勁。
-
單身男女2 (Don‘t Go Breaking My Heart 2)
導演:杜琪峯
主演:古天樂、楊千嬅、高圓圓、周渝民、吳彥祖
香港上映日期:2014年11月13日 
預告:https://youtu.be/Sfev2FSSPIs