증인 (Innocent Witness/5時恭候的證人) - 我本善良

1.導演強調電影重點係講人嘅溝通,反而我比當中人與人嘅關係吸引。無論鄭雨盛同金香起嘅主線、鄭雨盛同宋允兒或者同朴根瀅嘅副線都係咁迷人。

本身單純利用目擊證人嚟達致自身目的,但漸漸被佢嘅真摯喚醒自己良知,建立跨越歲數嘅友誼;昔日好戰友以至曖昧對象因位置變改而決裂,但人嘅本性係咪咁容易變改?

兩父子表面上笑騎騎,但原來老竇一直覺得對唔住個仔,自己迫使個仔背棄良知去搵食⋯⋯

對我而言整體故事結構幾典型韓式玩法,但贏在當中人物關係夠晒精彩同吸引。

2.香港觀眾睇慣本地法律題材電視劇,都大概明白陪審團制度嘅運作。但其實喺韓國陪審團制度絕對係件新鮮嘅事情,因為喺2008年先至有相關試驗計劃。

簡單咁講兩者最大分別係陪審團嘅裁決必須全體一致,如果無法達致一致就必須聽取主任法官嘅意見再進行投票。

再者陪審團只係諮詢用途,最終裁決交畀法官作為判決參考,並非似香港陪審團嘅裁決直接裁定被告人罪名成唔成立。

下個月韓國將有新戲『陪審員們』圍繞第一單利用陪審團制度嘅案件,令人幾期待當中故事。

3.韓國演員嘅眼神非常恐怖,而鄭雨盛簡直係表表者。當金香起問佢係唔係好人時,鄭雨盛嘅瞳孔突然放大,反映自己都被呢個問題嚇親。

當自己掙扎緊如何是好,突然俾人問咁嘅問題,一時反應唔切而有咁嘅反應。

另外飾演自閉症少女嘅金香起同樣咁勁,名場面必然係法庭被鄭雨盛批評無法得知人嘅情緒後,返到屋企望住媽媽所製造嘅情緒特質圖片而崩潰嗰下。

4.用特殊題材容易俾人話立心不良,電影用上自閉症其一係善用當中特質嚟幫助推進劇情、其二係想透過角色嚟反映普遍人士對佢哋嘅偏見。

社會上實在充滿太多唔肯去了解佢哋需要嘅人,往往都因為各種原因而歧視佢哋。

5.鄭雨盛嘅角色設計亦非常有趣,昔日為社會不公發聲嘅人因現實而折腰,但一張白紙嘗試沾污又何其容易?佢發現根本無法融入貪婪嘅世界,忍受唔到為求名利而放下良知。

做人最緊要問心無愧。
-
증인 (Innocent Witness/5時恭候的證人)
導演:李翰
主演:鄭雨盛、金香起
香港上映日期:4月11日
預告:
https://youtu.be/zxTYbmmhCWw