九龍不敗 (The Invincible Dragon) - 搞乜鬼陳果瘋狂習作

1.爛片第一誡:一直排唔到檔期上映,就算定咗檔都keep住改期。
.
陳果呢套「首部魔幻動作鉅製」拖足兩年先上畫,再改咗檔期後終於成功上到,反映片商對電影信心有幾「大」。
.
佢之前兩套合拍片質素極端,正當以為『燦爛這一刻』已經係陳果新低時,估唔到低處未算低 - 『九龍不敗』差到離晒譜,絕對問鼎2019上半年嘅爛片王。
-
2.雖則知道陳果拍呢啲商業片搵錢嚟拍『三夫』,但唔代表可以亂咁嚟。
.
故事大綱確實幾引人入勝,無奈身兼編劇嘅陳果未能將大綱化做完整劇本。電影有謎之聲做旁白嘗試串起成套戲,不過旁白添加過多個人情感尤如聽緊廣播劇咁。
.
重點係啲旁白無助梳理情節,應該大刀闊斧先剪澳門發生女警凶案前嘅劇情,一開波就係周國賢搵張晉尋求幫助,慢慢再插敍之前嘅野。
-
3.雖然Stephy同張晉所簽嘅經理人公司同天馬電影有關係,但兩者受力棒嘅程度大有不同。前者連續幾套戲份極少只係掛名女主角,相反後者就套套都係群星力谷,可見兩者差距有幾大。
.
睇訪問一早就知Stephy角色會死,但估唔到戲份會少到咁!再破『L風暴』以分鐘計算嘅出鐘時間!輕鐵站著住婚紗嗰幕甚至短過預告片嗰幾秒!
-
4.就算張晉攞過金像獎同好打得,佢喺『九龍不敗』嘅演出簡直慘不忍睹。開紅白藍膠袋見到自己未婚妻被粗暴殺害,本應係發洩激動情緒嘅一幕又被剪得好短。
.
好啦去到結局高潮打大魔王,又忽然浮誇失控演繹,柒到唔敢睇。呢種演法近年僅得『搏擊奇緣』嘅陳偉霆可以相提。
-
5.電影對白寫得尷尬而戇居 - 每次劉心悠出場都同張晉煩膠式強調「你個病好嚴重呀,要立即嚟睇我」、忽然搞同「Gay」有關嘅爛gag⋯⋯
.
情節上同樣充滿極多恥笑位 - 無啦啦同人講自己九條龍嘅故事、成架輕鐵出軌凌空轉嘅時候竟然兩人仲可以打到交、差館可以冇任何警員駐守、警方安排中醫師幫警察做精神同心理治療⋯⋯
.
成套戲無法以常理/邏輯去睇,不禁令我幻想陳果同林紀陶係咪飲住酒鳩寫劇本。
-
6.拍得差都可以靠剪接救套戲,但剪接奇怪 到完全摸不着剪接師嘅頭腦 - 兩位主角打鬥期間忽然剪個航拍大廈空鏡,做咩啫?
-
7.電影主打內地市場,主角張晉同劉心悠現場都係講普通話,後期親自配廣東話所以有唔夾口形嘅情況。
.
最神奇有幕吳岱融明明成段對白都係配音,偏偏中間有幾隻字係現場收音。
-
8.特技當然佔「魔幻動作鉅製」好重嘅部分啦,結局重頭戲澳門觀光塔嘅CG做得迫真,但其餘又係差到出汁。無論係輕鐵車外景、出軌定係「九頭龍」都係極差水準。
.
呢啲劣質製作同樣出現喺張晉身上,假髮、鬍鬚同紋身一close up就現晒邊,確實為全片保持低級水平。
-
9.爛片第二誡:首映後片商訪問藝人影後感嘅短片中,如果啲藝人講到無野好講,要讚啲九唔搭八嘅位時,你就知套戲有幾差。
.
要我格硬讚套戲嘅話,我真係諗唔到。
-
九龍不敗 (The Invincible Dragon)
導演:陳果
主演:張晉、Anderson Silva、鄭嘉穎、劉心悠
香港上映日期:6月20日
預告:https://youtu.be/oT1nl5NfWWY