濁水漂流 (Drifting) - 給我一個道歉

1.『一秒拳王』成功為mm2香港洗走頹風同劣評,而今年暫定上映嘅兩套電影質素方面亦同樣能夠維持水準。相信幫助到佢哋建立返正面啲嘅公司形象,尤其『濁水漂流』如無意外能夠為佢哋爭奪來年金像獎獎項提名添。
.
電影源自於2017年mm2舉辦嘅新晉導演計劃,李駿碩憑短片『瀏陽河』奪得大獎兼電影導演合約,經過幾年時間度劇本同籌備,終於出咗呢套戲。雖然佢唔係首次執導長片,但始終『翠絲』整個項目由舒生牽頭,導演嘅自主性無咁高,所以嚟到『濁水漂流』先係真真正正李駿碩嘅個人作品。
-
2.單純從電影題材出發,確實令人聯想起都係講無家者嘅『麥路人』,但睇完兩套戲就會發現根本唔可以相提並論。『濁水漂流』並唔係賣悲情嘅melodrama,佢係用平實方式闡述露宿者眾生相,藉此帶出主角捍衛尊嚴同公義嘅故事。
.
導演無刻意美化露宿者,反而係坦露咁呈現佢哋嘅日常生活。亦因此電影順理成章成為三級片 - 戲內充斥大量粗口還原真正基層生活。
-
3. 曾經何時睇過某位大導演嘅訪問,佢暗示吳鎮宇係好煩嘅演員,過分執着「著乜嘢衫去演個角色」云云。但的而且確造型能夠幫助演員入戲同演繹角色,例如鎮宇嘅服飾較為唔整潔,容易見到衫上有汗漬等。再用上大量粗口作助語詞,更貼地像真。
.
個人認為今次係鎮宇有望成功衝擊金像影帝之作,唔係因為論資排輩輪到佢,而係佢確實交出震懾觀眾嘅演出。某程度上有賴「老爺」謝君豪同佢相輔相成,相比之下李麗珍就唔係咁駕馭到角色嘅日常感,表現未如理想。
.
但最意外都係柯煒林同余淑培嘅『那麼溫柔的暴烈的』組合,嗰套短片就係令我入坑迷上柯煒林嘅原因,能夠睇到佢哋再度合作令我驚喜!
-
4.作為觀眾,其實我哋嘅視野同蔡思韵飾演嘅社工一樣,跟呢班露宿者存有一段距離。人嘅同理心之下,好自然就會對弱勢嘅人產生同情。當社工爆出一句「我唔係奉旨幫你」時,輝哥卻回佢「我都唔係奉旨受你幫㗎」。
.
呢段抹唔走嘅距離忽略咗弱者嘅尊嚴。正如我哋見到有老人家選擇拾荒維生,寧願自力更生都唔會攞綜援,呢個就係佢哋僅餘嘅尊嚴。電影最終唔係希望大家憐憫呢班俾政府同地產商迫壓嘅露宿者,而係理解佢哋嘅處境同感受。
.
面對強權恃勢凌弱,弱者只能敢怒不敢言。
.
特別一提戲內嘅吉鏡由劉君樂拍攝,片頭連串香港嘅樓景以及後段深水埗變得寂靜嘅吉鏡令我好有感觸,配合電影氛圍 - 儘管香港嘅住宅起得密密麻麻,偏偏呢班人卻無處可居,營造強烈對比。
-
5.隨住市區重建殺入深水埗,逐漸將呢個窮人區士紳化,唔少「文青」店舖亦進駐大南街一帶,整體社區貌似變得高尚好chill,但原本喺度生活嘅人卻變得格格不入。一直以嚟都有指某啲地產商為咗賣樓而要求政府不斷「洗太平地」,務求將露宿者趕出居民視線範圍。如此趕盡殺絕只係粉飾太平。
.
戲內一班露宿者主要係道友,呢個身份確實會令好多人唾棄,但唔代表可以剝削佢哋嘅權益。回到吳鎮宇一直所強調嘅重心 - 「做錯就要道歉」,由頭到尾唔單止係賠償嘅問題,對佢嚟講最重要係一個道歉。係咪因為佢哋嘅身份而可以任由政府愚弄?
-
6.戲中一幕鎮宇怒斥記者根本唔關心真正嘅議題,只係一直想從佢哋身上搵出「點解會吸毒」「點解要瞓街」等Juicy啲嘅題材。其實呢幕正正貫串整套戲嘅玩法 - 導演故意未有清楚交代眾人背景,因為由頭到尾電影重點唔係深究佢哋點解淪落至此,而係佢哋所面對嘅困局。
.
平時睇戲觀眾會着重角色嘅動機/背景等資訊,但套戲突然同你講呢啲嘢唔重要,因為呢啲元素唔應該左右觀眾理解主角捍衛到底嘅原因。『濁水漂流』注定係套兩極化評語嘅作品,李駿碩如此玩法實在藝高人膽大,顛覆大家普遍睇戲心態,確實難以霎時間令所有人跟得上或者接受。
-
7.輝哥同木仔猶如父子般關係牽動電影主線發展,輝哥本想藉此救贖自己兼當俾機會自己重新做人,所以下定決心戒毒。去到最後卻發現其實「邊個都救唔到邊個」,呢個係無法逆轉嘅宿命。
.
最後一個鏡頭為電影劃上最無力最沉鬱而現實嘅句號。
.
亦都係呢幕,令我睇完之後決定要係嘉禾V WALK做包場。作為距離現場最近嘅戲院,加埋樓上嘅豪宅形成巨大對比,喺度搞極有意義兼諷刺性。
.
再度感激 mm2 香港 協助籌備本次放映活動,我堅信好戲一定有好報。「撐好電影,撐好港產片」!
-
濁水漂流 (Drifting) 
導演:李駿碩
主演:吳鎮宇、謝君豪、李麗珍、蔡思韵、柯煒林
香港上映日期:2021年6月3日
預告:https://youtu.be/Dive0mfX_UM