熱血合唱團 (Find Your Voice) — 反客為主

1.2015年『五個小孩的校長』逆市創票房奇蹟,翌年導演關信輝再次聯同編劇張佩瓊炮製勵志感人作品『熱血合唱團』,可惜拍完後一直未能上畫。擺咗接近4年,失驚無神彈出嚟上映令人好奇套戲到底質素如何呢?

整體而言我欣賞導演同編劇對於勉勵年青人嘅熱誠同毅力,可惜現時成品節奏奇怪兼且質素粗疏,未能充分突顯想表達嘅情感,就比較太惋惜。除咗失望之外,同事疑惑點解套戲會係「促進上海電影發展專項資金資助項目」,完全摸不着頭腦。

2.原理上劇本可以照抄返『五個小孩的校長』嘅套路,只係改啲元素已經搞掂晒。不過今次難度極大 — 除咗劉德華外、仲要講六位學生各自面對成長中嘅困難兼個別家長嘅管教方法、盧冠廷飾演嘅校長點堅守「有教無類」精神、同劉華截然不同嘅指揮同管教風格嘅雷頌德、淨係注重名利嘅校監吳岱融⋯⋯

全片僅長97分鐘而需要顧及咁多情節同人物,『五個小孩』冇咁複雜兼且長多15分鐘添。『熱血合唱團』淨係處理劉華同六位學生經已用上好多時間,因此片首出現猶如濃縮版電視劇咁極速交代眾多角色背景設定,喳喳林將呢班人堆埋一齊再慢慢闡述佢哋面對嘅問題。

而呢個節奏完全錯晒,咁急速反而令觀眾疑惑電影點解選取如此敘述手法。喺咁短時間展示咁多人嘅故事,剪接只能選擇揭示學生問題後立即提供改變方案,無提供多啲空間醞釀學生「為何」同「如何」改變。

劉華嘅角色「嚴Sir」睇落唔覺有乜嘢幫助到班學生,『五個小孩』嘅呂校長都會不斷家訪游說家長,反而嚴Sir唯一嘅家訪都以失敗告終添。

3.睇返現時電影公司所公布嘅故事大綱,電影原先以王智騫飾演嘅壞學生馮信希做切入點,由佢點樣被迫參加熱血合唱團試驗計劃帶出劉華飾演嘅知名指揮,從中再穿插其餘五位學生嘅故事。

但而家最終成品卻變成劉華受盧冠廷邀請返港指揮合唱團,主線副線完全掉轉晒,如果用返最初嘅版本相信效果冇咁急速突兀。始終套戲重點係班學生點藉住合唱團訓練改變自身睇法,而唔係嚴Sir如何拼命幫助改變學生囉。憑電影後段嘅一啲零碎畫面,相信當時確實係拍成故事大綱嘅版本,只係經過剪接變成咁嘅慘況。

信希喺後段提及自己想做太空人,觀眾或許感到莫名其妙,但喺製作特輯睇到部份刪剪片段,原來盧冠廷誠心勉勵佢時就用太空人做比喻,不過刪剪咗搞到好跳脫。唔知有冇機會睇到導演同編劇創作初衷嘅版本呢?應該唔會好似而家咁災難。

4.劉德華繼續施展劉華style演繹角色,仍然停滯不前嘅本色演出方式無阻佢以至電影上嘅發揮。其餘嘅一班老戲骨演得稱職但戲份非常有限,冇辦法展示更加多俾觀眾睇,不過李麗珍肥腫嘅狀態飾演呢個角色係非常適合嘅。

至於新演員方面,我私心鍾意王智騫多啲嘅,演出淡定自然加上外型好,絕對係個可造之才同明日之星。伍詠詩就相當青澀而吳卓衡嘅演繹同外貌一樣有啲生硬啦。最意外係劇組比起『新喜劇之王』選用鄂靖文做一個較為重要但比較少戲份嘅合拍片必要角色。

5. 有『五個小孩的校長』前車可鑑,自然明白電影牽涉同埋主打感人催淚嘅情節。但當以上角色發展薄弱,劉德華同佢哋嘅交集同幫助亦都唔明顯時,出到嚟感覺係有啲夾硬。

單獨嚟睇全片兩大催淚位,以劉德華臨走前自白殺傷力最大,不但點出全片想帶出嘅訊息,加上演員真情流露令威力更大。反而最終比賽過程就頗為造作,本身班學生正正經經唱「You raise me up」配合歌詞已表達到嗰種感動。

但係死都要加劉德華喺機場候機室猶如無人之境咁激動指揮,再加無啦啦整段Rap瞬間破壞氣氛。尤其段Rap嘅亂入非常尷尬,明顯編劇係上一代嘅人刻意融入新一代思想而做出如此老尷嘅玩法。

6.善用經典金曲就好似味精咁能為電影錦上添花,今次就用上林子祥『誰能明白我』突顯同總結角色嘅感受同精神。呢班學生由被迫參加合唱團,漸漸從中獲取友誼同自信心,最後確實如歌詞咁「用歌聲 用歡笑 來博知音的讚賞」。

佢哋嘅出身、過往嘅行為性格或許給予大家負面觀感,即使已經輸在起跑線上,但「熱血合唱團」幫助佢哋展示自己都可以發光發亮嘅一面。方法同態度已經灌輸咗比佢哋,選擇繼續自暴自棄抑或茁莊重生,只由佢哋自己選擇。

其實唔單止後生仔,人面對挫折同挑戰嘅時候容易迷失,往往用藉口逃避嘗試令自己好過。要正視同解決問題需鼓起好大勇氣,但記住有心總係唔會遲。

7.回復理性,電影仲有唔少地方幾奇怪或者瑕疵。例如小龍嘅黐脷筋中段有所改善,但最後上台表演時故態復萌;關禮杰燒炭入醫院後下一幕就打出「昏迷第三日」對劇情推進毫無作用但引起觀眾恥笑。

不過最錯誤嘅,就係同『打噴嚏』一樣錯過最佳上映時間。如果當初食住『五個小孩的校長』嗰勢乘勢追擊,香港票房唔會咁慘淡嘅。
-
熱血合唱團 (Find Your Voice)
導演:關信輝
主演:劉德華、王智騫、伍詠詩、吳卓衡、林愷鈴 
香港上映日期:2020年11月26日
預告:
https://youtu.be/k-glf-O-NJw