G殺 (G Affairs) - 絕望之都

1.第一次喺電影節睇完時,我驚嘆香港終於出到套玩另類風格嘅電影,陳漢娜嘅演繹令人留下深刻印象;直到上映當日睇第二次,我漸漸同情黃璐嘅角色,到結局時不斷咁喊⋯⋯

到而家我都百思不得其解點解會喊,唯一解釋係被劇情牽引情緒,到結局時忍唔住抒發出嚟。電影嘅偏鋒風格未必每個觀眾鍾意甚至接受,但我個人認為呢套係近年香港電影中好值得關注嘅作品,衷心希望未睇嘅朋友盡快入場觀看。

2.普遍首部劇情電影計劃比賽嘅作品風格較為穩陣,但有趣係引起回響嘅電影都以社會題材為主。

『G殺』透過一連串同「G」開頭相關嘅事物,以非線性剪接手法呈現畀觀眾。無論用色、鏡頭定劇情風格均偏向日系電影,港產片如此玩法實在罕見。

3.作為主演中最有經驗嘅杜汶澤,佢喺電影成功壓場兼帶領三位新人,可惜佢喺訪問表示『G殺』係最後一套參演嘅電影,因政治立場而令到香港影壇少咗位近代標誌性喜劇演員,確實係觀眾嘅損失。

唉。

4.至於三位新晉演員,陳漢娜嘅驚艷演出不禁讓我陷入佢獨特魅力,而李任燊演繹亞氏保加症患者亦入型入格。反而林善嘅演出較為比下去,略嫌有啲生硬。據聞佢今年為演藝學院電影電視學院其中一條畢業作品擔任主角,唔知演技有冇進步到呢?

5.全片我最鍾意林善VO嗰段,完全講中年輕人對社會嘅不滿同怒火,配上阿澤盜亦有盜式平衡各方地下勢力,光怪陸離嘅情節亦係香港嘅縮影。

拉大提琴同做愛共處一室嘅場面貌似荒誕,但對我有幾深嘅意義 — 就同阿澤喺林善面前做愛一樣,無咗大家做讀者我根本唔知自己做成點,感謝喺各平台遇上你哋嘅支持,令我繼續走落去。

6.黃璐出場以為佢係典型狐狸精,點知背後故事簡直蕩氣迴腸 — 喺上面比領導包咗咁多年諗住落香港有好日子過,原來只係成為別人嘅影子⋯⋯

最後寫比林善嘅信叩中我淚點,即使想重新做人都唔容易,就好似潔淨嘅水被污染後點整都清唔到。

7.電影充滿絕望感,呢種末日焦慮久違喺港片出現。

「香港好似變得更好⋯⋯其實係變得更差」

楊卓娜所演嘅老婆離世,換來任職妓女嘅黃璐,杜汶澤嘅口味似乎差咗。但有無諗過其實佢同楊卓娜係唔襯呢?同黃璐一齊先至係絕配?

我哋覺得香港退步緊,但逆向思維其實只係顯露返中國人嘅劣根性。

8.「世界是你們的,也是我們的,但是歸根究底是你們的。」

偏偏嗰班眷戀權位嘅老屎忽為咗自身利益而斷送整個城市嘅未來。

現時香港有無數問題纏身,但出乎意料地社會異常平靜,到底係終極爆煲前嘅虛像,定係啲人已經放棄咗香港?
-
以下部份將會討論結局部份,敬請再三考慮方繼續閱讀。
-
9.傳統電影會用新一代/年輕人比喻成對未來嘅盼望,偏偏傅以泰同趙雨婷最終選擇跳樓結束生命,到底係咪新一代都無立足之地?

可能「摩擦力強」嘅朋友都會留意到,最後街景Top Shot見到有個女人拖住個喼離開大廈,望上天空後就過馬路走咗。個人推斷係戲中黃璐嘅妹妹,又或者係另一個平行時空嘅黃璐 — 如果佢無喺嗰度搵食,就會完全逆轉整件事。

不過世事點可能改變。

我哋依然繼續活喺呢個虛偽、絕望嘅社會。
-
G殺 (G Affairs)
導演:李卓斌
主演:陳漢娜、杜汶澤、黃璐、李任燊、陸駿光、林善
香港上映日期:3月14日
預告:
https://youtu.be/4rZO01w8vgw