火鍋英雄 (Chongqing Hot Pot) - 失敗者聯盟

1.本身睇完預告片後,我預期個結局都係畀警察拉等中國式收尾,始終講緊打劫銀行喎,唔槍斃都算偷笑啦。點知電影其實正正相反:主角們意外地掘到銀行金庫,佢地只係千方百計想填返個洞。另外可能打劫銀行題材係內地較為敏感,大陸版嘅『長江招商銀行』變成『長江巴商財富』。

2. 而真正打劫銀行嘅小鮮肉四人幫,所帶嘅頭套正正係西遊記嘅唐僧四師徒!導演透過佢地嘅頭套嚟清晰反映呢幾個人嘅分工同性格,好聰明嘅設定。

3. 電影嘅鏡頭將重慶獨特嘅一面帶畀觀眾:單軌火車、岸邊高樓等彷似日本動漫嘅未來都市咁。另外故事方面亦用重慶多防空洞,而衍生出大量洞子火鍋嚟做橋段。

4. 電影意外地走黑色喜劇路線,最爆都係結局佢地嘅決定,荒誕到極!

5. 今時今日影視作品已經離唔開各種廣告植入,過往都講過唔少電影呢方面嘅問題,因為其實做得靚就無晒事。今次有個中規中舉嘅例子s:銀行旁邊係蘇寧 ,無close up只係track過;失分位喺Lawson度,太想強調係Lawson而令個櫃上嘅價錢牌換晒做Logo,咁咪錯囉。

6. 三位男主角由片頭開始已經不斷有分歧,去到中間好似真係無朋友做,但當朋友有難,佢地用自己嘅方式嚟幫朋友。講到底,佢地都係想維繫返呢段友誼。

7. 見到有白百何,代表又有愛情線啦,但係只佔較少篇幅。但白百何係有種魔力,就係佢好百搭,配咩男演員都好襯。

8. 四位主角都係唔同地方嘅失敗者:陳坤爛賭搞到一 事無成;白百何太堅守自己嘅原則而遭同事排斥;秦昊雖然有錢但只係胡混過活;喻恩泰係三兄弟之中最落力打理生意、但依然做到一塌糊塗。呢四個人本身係”犯人”而誤打誤撞變成英雄,電影名所以就咁樣改同埋完結先擺出片名。

9. 內地無電影分級制度,令到好多電影都避免過度暴力、血腥,以此達到小朋友都睇得。但『火鍋英雄』嘅動作場面就完全豁出去,首推當然係後段火鍋店混戰,絕不留手咁盡情大灑血漿,加上巧妙運用鏡頭,又做岀一幕經典場面。

10. 好多香港觀眾都覺得內地電影有種娘味,但『火鍋英雄』一定令你另眼相看!電影猶如打邊爐咁,要咩元素都有齊晒,最緊要整體『食』得過癮!

火鍋英雄 (Chongqing Hot Pot)
導演:楊慶
主演:陳坤、白百何、秦昊、喻恩泰
預告:
https://youtu.be/cULX8XmFEhU