無痛斷捨離 (Happy Old Year) - 情感的禁區

GDH今次以近年興起嘅「斷捨離」概念轉化成電影題材,滲入主角面對愛情友情親情嘅衝突,再度炮製針對到年輕人市場嘅作品。

全片整體風格類近日本電影,節奏劇情比較輕淡,配以最簡潔嘅用色配樂鏡頭擺位等。當然咁嘅做法亦都切合返電影主題「斷捨離」啦,透過咁樣「less is more」將角色嘅情感有效地最大化。

睇過嘅朋友相信都會同我一樣鍾意套戲,但最大斟酌嘅地方就係女主角身上。
-
以下將探討主角性格,當中涉及戲中情節,懇請再三考慮方繼續閱讀!
-
「情感有若行李 仍然沉重待我整理」

女主角一開始決定要「斷捨離」,係為咗打造簡約風格studio方便自己工作需要,佢能夠大刀闊斧咁揼走晒啲舊物,某程度上同性格有關。

佢自己面對各種唔識處理嘅關係時,都選擇逃避而非正面解決。大提琴、相機、黑膠碟、鋼琴呢啲都引證佢過往多段逃避現實嘅關係。

即使受閨蜜責備後決定將舊物歸還畀人時,佢嘅出發點仍然只係想自己好過啲。正如男主角所講女主角由頭到尾係想贖罪,旁人嘅感受從來都give a shit。

女主角切切實實係自私自利嘅人,為咗自己move on而強迫人哋都要move on,絕對唔討好觀眾。

偏偏咁樣嘅人物設定令我覺得非常吻合人性,劇情走勢並不似觀眾所預料咁發展更加貼近現實。

「人人都係自私,你同我都係一樣。」

-
無痛斷捨離 (Happy Old Year)
導演:Nawapol Thamrongrattanarit
主演:Chutimon Chuengcharoensukying、Sunny Suwanmethanont
香港上映日期:3月26日
預告:
https://youtu.be/TKKttTQUliE