不日成婚 (Ready o/r Knot) — 合久必婚?

1.疫情令香港影業嚴重受挫,英皇同天下一兩大港片巨頭上年毅然攜手合作,宣布一齊製作同發行十套電影,而『不日成婚』就係首套作品,亦係編劇陳茂賢首次執導之作。

開鏡當日大鑼大鼓宣布賀歲檔上映,想食正初三係情人節嘅大好時機,可惜戲院初七重開有好多大片湧住上,英皇退而求其次選擇延至復活節開畫。

以今次合作去睇,整體製作事項由英皇處理,僅有電影器材同後製由天下一負責。睇到End Credit發現英皇原來負責埋香港、大陸以至國際發行,而非兩者共同推進,呢種合作模式同想像中幾大出入。
-
2. 首段Teaser以類型片方式包裝電影,原來戲內情節亦大玩懸疑驚慄、警匪追捕般鬥智鬥力、黑幫片式嘅兄弟情義營造男女攻防大混戰。咁嘅玩法難免令人聯想彭浩翔嘅『大丈夫』,事實上電影部分橋段或風格同彭浩翔葉念琛等導演嘅作品有啲相近嘅。
-
3.透過玩類型片誇大情節反差感,某程度將愛情甜蜜又可怕一面展露得淋漓盡致。一紙婚書除咗代表承諾亦象徵責任,當愛情進入平台期洗掉過往嘅激情,係咪只有結婚先可解決問題?
.
「有啲野好哋哋就唔好搞,一搞就爛啦。」呢句對白我幾認同嘅,可惜電影仍以大團圓結局收尾,如果跳得出呢個框框會令電影昇華多一級。結婚係形式或者名義上維繫兩人關係,只要係深愛對方無需理呢啲形式上嘅野嘅。
-
4.正當大家討論現時社會氛圍下難以製作喜劇時,『不日成婚』就以作品質素力證絕對無咁嘅事!難得有如此瘋狂又貼地嘅愛情喜劇,密集式笑點不斷牽引觀眾連場大笑!
.
不過就算笑話寫得夠癲喪、對兩性比喻有幾啜核都需要有演員嘅配合先顯得過癮。陳家樂Lak哥扮演吊兒郎當大細路嘅表現比想像中搶眼,同Michelle早有默契合演情侶火花四濺自然毫不造作。朱康現時戲份剛好拿捏到火候未有喧賓奪主,估唔到阿談可以駕馭咁強悍嘅對手,遇強越強。
.
岑珈其嘅個人魅力繼續帶動氣氛,男子組整體互動性非常之正,成班損友不斷口沒遮攔爆出狂言,相對之下女子組就比較削弱了。而且楊偲泳全片保持呈現西口西面,我分唔清佢係投入唔到角色定選擇咁樣去演繹。
-
5.最初略嫌鏡頭較為單調,一去到傾偈場面尤其開頭屋企斟茶或者五周年慶祝食飯咁長時就會突顯呢個問題。兩兄弟催眠Lak哥嗰吓track shot係幾正,但Michelle玩鋼管舞嗰幕就轉到暈咁滯。
.
片頭用Snapshot交代兩人由蜜運轉趨平淡、以及後段MV式平衡表達兩人情感上嘅差別就係我全片最鍾意嘅部份。不過電影去到最後20分鐘先到轉接位,比例上有啲失衡嘅。
.
儘使片內含有沙石,但確實難得睇到咁賞心悅目兼有意外驚喜嘅愛情喜劇,諗諗吓對上一套咁滿意嘅同類型電影已經係『原諒他77次』,都成四年前嘅戲啦。

但最重要,近年令我笑得咁密兼開心嘅港產喜劇,真係唯獨『不日成婚』而已。
- 
不日成婚 (Ready o/r Knot)
導演:陳茂賢
主演:陳家樂、衛詩雅、朱柏康、談善言、岑珈其、楊偲泳
香港上映日期:2021年4月1日
預告:https://youtu.be/tGUxpL9evxc