真.三國無雙 (Dynasty Warriors) — 智勇新境界

1.前幾年蕭定一嘅HMV數碼中國可算風頭一時無兩,信奉IP係王道而購入多個中港著名小說/電視劇版權再拍電影版。呢套『真。三國無双』就係當年其中一個矚目嘅項目嚟,畢竟改編熱爆亞洲嘅遊戲,如果拍得靚靚仔仔會食中唔少地區市場。

可惜HMV資金鏈斷裂令整個影視皇朝倒下,市傳蕭生欠債累累不得不將手頭上嘅電影項目轉讓畀債主或者套現。現時電影出品公司已經見唔有佢份,僅僅得香港嘅發行同宣傳權。不過值得一提出品人同監製係有昔日HMV嘅關聯人士,所以都係唔知佢搞邊科。
-
2.『殺人犯』『大追捕』大導演周顯揚過往作品質素相信大家有目共睹,今次繼續冇令大家失望!電影淨係頭半個鐘已經笑到我口罩都濕晒!完全估唔到係一套笑片嚟!

古天樂騎馬追住王凱一幕更將啲馬當電單車咁靈活操控 - 成隻馬完全打平避開冧咗嘅樹,超出常人嘅理解範圍!另一我特別推介場面係華雄連續斬甩幾個人頭,每一個都飛到勁遠嘅山窿入面,如果佢係今時今日出世一定係一個哥爾夫球奇才!

導演喺場面調度方面亦非常之成功,後面「三英戰呂布」處理得非常混亂,觀眾冇辦法識別到邊個打緊邊個,甚至會睇唔清係邊位演員!配以流到爆嘅CG、「來又如風離又如風」赤兔馬、關羽爆衫用自己肉身幫把刀開光⋯⋯太豐富啦!

你話點可能唔會笑吖。
-
3.電影遠赴紐西蘭拍攝,雖然當地景色浩瀚但搵華裔臨時演員變得困難,部分騎馬鏡頭見到主角以外嘅騎兵都係外國人!原來早喺三國時期已經有外國勢力介入!

或者紐西蘭嘅風景實在太靚,導演都忍唔住拍唔少演員嘅Mood Shot,睇睇下以為係紐西蘭觀光局宣傳短片多過電影囉。
-
4.係咪因為打正旗號改編自遊戲所以啲CG可以做到咁流?成千上萬嘅士兵只係Copy and Paste咁擺喺場景,無限瘋狂loop住一樣嘅動作 - hea住咁搓嚟搓去「開拖」,劈中人又完全無血!

儘管我好想進入導演創作嘅世界,但如此低劣水準真係難以令人投入,反而只會不斷令我發掘更多恥笑嘅地方。
-
5.演出陣容當中,香港演員除咗張建聲全數自己配音,難以理解點解會有咁嘅安排。不過最匪夷所思係搵黎耀祥配王凱把聲!不但年紀差別大完全唔夾,黎耀祥仲唔知點解成日用陰陽怪氣嘅語調講野。

雖然事前知道呢個「星級配音」,但當王凱第一次講對白嘅時候我真係忍唔住笑到抽筋,嗰種滑稽程度你以為係惡搞電影片段嚟。
-
6.杜緻朗繼『殺人犯』後再次炮製令人啼笑皆非嘅經典對白!首先安排劉嘉玲以極為認真態度講出古天樂「外表俊美」,其後幾幕士兵不斷向主角大嗌「我願意!」以表忠誠!

非常難得呢套戲係每個範疇上致力去搞笑,令觀眾喺疫情期間苦中作樂。咦唔係喎,呢套唔係笑片嚟㗎喎。
-
7.拍攝期間被兵器誤傷眼球嘅古生以為佢係主角,點知上映前海報忽然冠以「特別領銜主演」,原來戲份同配角相約而已。嚴格上劉關張同曹操先至係主角。

三國無雙嘅世界咁大,電影一早預留定後路以便開拍續集。而電影就模仿「赤道」般係最後打出「三國混戰的時代 才正式開始」,令大家愕然睇咗咁耐只係一個續集預告!

坦白講以目前電影喺國內票房仆直,賣俾Netflix個價亦都未能回本,兼且原定推進項目嘅主要公司處於收皮狀態,開續集嘅機會近乎係零。

周顯揚伉儷嘅作品已經三連仆,而且獲獲新鮮獲獲金。唔知仲有邊位老細咁有膽識搵佢開戲呢?有嘅話就祝佢好運啦。
-
真.三國無雙 (Dynasty Warriors)
導演:周顯揚
主演:王凱、古天樂、楊佑寧、韓庚
香港上映日期:2021年4月29日
預告:https://youtu.be/Sxuv9A352Gk