當男人戀愛時 (Man In Love) — 只想找一個伴 但崩壞的命盤

相信所有入場嘅觀眾,不論男女都被戲內邱澤嘅魅力吸引!表面上係爛撻撻嘅收數佬,內心卻極其溫柔同細心,顛倒女主角同觀眾嘅心!基於家庭問題,無奈令佢踏入如此複雜嘅行業,為咗喺業界生存自然肩上凶狠外表,但心底裏只係個善良、渴望被愛嘅普通男人。

而許瑋甯則面對父親病危要獨力孭起沉重醫藥費,透過長期黑面嚟突顯角色嘅厭世感,有種冰山美人嘅感覺。

喺保齡球場極老土地唱出電影主題曲一幕,雖然係好鬼肉麻但符合兩位主角愛惜對方熱烈嘅愛情。「你予我這世人最後的期待 你是我的未來」,正因佢哋湊巧遇上對方,改變以往刻板平凡絕望嘅生活。

當男人戀愛時,會奮不顧身竭盡全力去奉獻自己一切。有如巨大冰山般嘅女主角亦不禁逐漸被男主角溶化冰封多年嘅心,愛情面前儘管身份南轅北轍,仍然無阻兩人愛得激烈。

不過作為改編自同名韓國愛情電影嘅作品,頭半嘅甜蜜溫馨只係前菜而已,後段嘅情感大崩盤先係套戲嘅主菜。唔單止兩位主角欲斷難斷嘅愛情瓜葛催淚,男主角屋企條線同樣咁勁,務求全方位令觀眾爆喊。

電影成功喺台灣大收四億台幣,大陸亦有兩億人仔票房,係繼『比悲傷更悲傷的故事』後又一大賣嘅台灣愛情片。應該唔少電影公司會乘機食住個勢,發掘韓國仲有啲咩愛情片值得翻拍。

-
當男人戀愛時 (Man In Love) 
導演:殷振豪 
主演:邱澤、許瑋甯 
香港上映日期:2021年7月22日
預告:
https://youtu.be/nHHFoo1OW7I