생일 (Birthday/沒有你的生日會) - 逝者已矣,生者如斯

1.不得不佩服韓國電影出咗好多優秀嘅近代史電影,但好似『逆權大狀』、『1987』等都係事件過後三十幾年先至拍商業片,而世越號五周年就已經有兩套作品上映,分別係李善均主演嘅『惡霸警察』同今日介紹嘅『生日』。

個人認為前者有啲消費世越號嘅憤怒,未能突出必須用呢件事作題材嘅原因。相反後者謹慎處理事件,避談政治或各種陰謀論,專注講家屬點樣面對兒女離世,令觀眾感受到製作團隊嘅真摯。

2.故事開展有啲令我措手不及,所睇嘅預告片無觸及相關劇情內容,但咁樣嘅情節安排令觀眾跟男主角同步建立家庭。

頭三份二時間透過一連串事件反映親友對往生者嘅牽掛,最後當然係點題嘅生日聚會。全片情緒大致上平淡,令我聯想起『情牽海邊之城』- 以最淡然嘅方式講述悲劇故事。

3.同樣地男主角孤獨感非常強烈 - 缺席父親責任多年,某程度怪責自己未有好好守護家庭,最悲哀係老婆唔原諒自己、同個女嘅關係又有段距離感⋯⋯

其實角色幾典型亞裔男人形象,外表硬朗但其實內裏脆弱,不善於表達個人情緒,好多嘢都收收埋埋唔想俾人知,容易營造情緒崩提隨時崩潰。

今次喺韓國睇咗薛耿求兩套作品,咁啱兩套都係演繹喪子之痛嘅父親角色,不過兩者性格懸殊,『生日』嘅角色極為內斂孤單。就算遭遇一樣,佢都仍然能夠演繹兩種不同層次出嚟,確實犀利。

4.十幾歲本應係美好年華,可以消耗青春準備投入大世界。試想像同你日夜相對嘅人離世,突然丟空嘅席位並唔容易填補。

戲內親友用各自方式記住/懷緬同往生者嘅美好回憶,好似父親經常獨自到河邊露營回憶以往經歷、母親一直保留兒子房間嘅事物,不斷睇返過往短訊內容同錄影片段。甚至好似朋友咁為往生者達致未完成嘅願望,到越南旅遊。

失去親友感覺實太難受,唔係一朝一夕就可以抒懷,尤其是間中忽然勾起以往生活點滴,不知不覺間回到痛苦當中。

5.電影副線描寫朋友方面,同樣容易令人陷入悲痛。普遍問題係難以面對家屬,就算咁啱撞到都情願兜遠路唔想見面。

點解會搞成咁?同自己產生罪咎感有關,「點解自己冇事而偏偏朋友死亡?」。因為自責,所以唔知點樣面對。

6.男女主角以自己方式執着地為兒子做事:不斷購買新衫、為護照吸上出境印章、就算玄關感應燈間竭性失靈都會認為係兒子回魂返屋企。

男主角明白事實,只係想為兒子達成心願;而女主角一直未能接受現實,不斷製造兒子繼續生存嘅痕跡。但「不認不認還需認」,後段崩潰失控大嗌就係佢重新面對返殘酷事實。

就算搞幾多野都好,人死不能復生。呢個係永不磨滅嘅傷疤,唔會因為時間沖洗掉淡。

但女主角過分掛念兒子,無論煮飯定買衫都只考慮兒子,卻無視細女感受。懷緬往生者而忽略仍在生嘅人會否有啲本末倒置?

7.電影簡直係催淚彈,全片夾夾埋埋超過十個位均令人爆喊,如果能堅持到底一滴眼淚都唔流,我真係非常佩服。

由最普通與往生者相關物品(短訊、影片、班相、皮鞋以及房間)勾起回憶、再到家屬嘗試強顏歡笑地聚會但突然變得寧靜、細女因為陰影而死都唔肯落泥灘、男主角跪求出入境當局蓋章⋯⋯

幕幕令人揪心,喊到要飲水補充水份。

8.當自己仍然未能跳出喪子之痛,身邊各種三姑六婆出嚟指指點點,八吓保險金有幾多、甚至叫佢哋搞咁耐好收手。呢啲涼薄說話睇到好憤怒,偏偏現實真係有人咁諗。

9.片名『生日』除咗係指往生者嘅生日之外,更代表在生者生存嘅日子。喪失至愛後如何繼續生活?電影唔係教觀眾忘記傷痛努力生存,而係掛念至愛同時亦要好好生活。

電影充滿悲痛但溫暖。

10.有人話萬事起頭難,相反我覺得電影點樣結尾先最重要,虎頭蛇尾已經見慣不怪。電影最尾一幕簡直係藝高人膽大,處理得稍微失當立即變喜劇/驚慄片,但佢成功塑造略帶溫暖嘅結局比觀眾。

睇完先知導演師承李滄東,果然嚴師出高徒。
-
생일 (Birthday/沒有你的生日會)
導演:李鍾言
主演:薛耿求、全道嬿
韓國上映日期:2019年4月3日
預告:
https://youtu.be/pIhjLTOK3Dw