究竟立體機動裝置work唔work?

#少量劇透

等咗咁耐之後,《進擊的巨人》第四季終於都開播喇!三位小編絕對係佢嘅粉絲,《進巨》嘅故事、角色、世界觀等等都寫得非常好,我地真係好想知道最後嘅結局會係點!不過我地今日黎係為咗一個原因:「立體機動裝置」究竟係現實生活之中work唔work呢?

立體機動裝置,係故事裹面用黎砍殺巨人其中一個重要嘅工具。係《進巨》嘅漫畫之中曾經畫出其構造同埋原理,我地可以係畫裹面了解諫山創(作者)對裝置嘅所作出嘅設定(圖二):裝置會射出固定器,固定係建築物或者巨人上面之後,再利用高壓瓦斯將固定器嘅纜繩捲回令身體高速移動,使使用者可以係城市,森林等地方自由移動。

故事中嘅設定裝置除咗本體、固定器發射機同埋氣筒之外,仲有纏繞身體嘅綁帶所構成。綁帶其實係其中一個最現實嘅結構,咁係因為綁帶可以提高裝置覆蓋身體嘅面積,當固定器收回嘅時候所産生嘅力,使用者身上嘅綁帶可以將力平均咁擴散係整個身體,而非單一一點之上,可以減低使用者受傷嘅風險。

不過,非常唔好彩,立體機動裝置合乎現實嘅部分已經完結,以下全部都係裝置唔合乎現實嘅地方。

裝置嘅功率輸出

立體機動裝置可以令使用者高速移動,根據動漫裏面嘅畫面可以得出平均嘅速度為每小時60至75公里,相當於香港部份高速公路嘅上限(諗下你用緊個裝置嘅時候比人影快相)。假設使用者連裝置嘅重量係85公斤,咁樣我地可以得出裝置最少提供嘅功率(Power)大約係:9500W,當然裝置仲可以令使用者飛行同埋進行各種花式操作等,所以裝置實際所輸出嘅功率會比我地計到數字更加高,小編估計有可能達到15000~18000W。

經過小編非常粗略嘅計算,每公斤嘅核能原材料鈾235(235U)每公斤可以輸出30000~40000W嘅能量,而裝置嘅能量來源:冰爆石大約係每公斤5000~6000W,所以冰爆石亦都唔係完全冇可能存在係現實,不過要點樣放得入一個合裏面再帶住佢飛黎飛去,再令佢輸出我地所需嘅能量先至係真正嘅問題。

使用者嘅移動方式

根據外國Youtuber Nerdist有關立體機動裝置嘅片,佢地利用三笠(Mikasa)第一季之中其中一幕,飛行一個街口並斬殺一名巨人,計算出三笠所承受大約45G嘅加速度,Nerdist認為因為人體最高可以承受大約45G嘅加速度,所以並唔會對人類身體有害。不過小編我用兵長斬獸巨中嘅一幕,佢係1.5秒之內圍住獸巨嘅手轉咗八圈(圖三),我地可以借此計出兵長係嗰1.5秒之內所承受嘅加速度係170G或者更加多。

其實類似嘅場境係故事裏面出現嘅次數多不勝數,係咁高嘅加速度底下,使用者輕則暈低,重則直接死亡,其結果都係一樣。

雖然我地可以輕易總結立體機動裝置係現實並唔可行,不過都係冇阻小編繼續期待《進撃的巨人》嘅結局!

快啲follow Inscie嘅content! 
https://linktr.ee/insciehk