行山前有咩裝備係必需攜帶同準備呢? - 向嵐行·山樂

好多人成日以為行山,只係著件運動衫或者著隻靚靚波鞋就可以去行山架啦!其實準備既野都幾多架~不如我又分析一下有咩裝備係必需攜帶同準備呢?

1. 帶備充足水量/份

帶備充足水量/份其實真係好重要,尤其係天氣唔太涼又熱熱地既時候,飲水就變得好重要啦!因為飲唔夠水,會令到身體缺水,而且直接影響黎緊行山既情況,甚至有機會引發抽筋、頭暈等等問題,嚴重既可導致中暑等大既症狀。所以記得一定要帶備充足水量/份先好出發啦!

2. 行山食糧

當你準備出發行一條比較長既路線,最好準備少少食物進行補給,無論條行程長或者短,都要準備帶備糧食補給,因為有機會有其他突發事件發生,令到行程有變,有時一個唔小心,受傷要留係山上,又唔可以即時落到山,咁樣就要需要糧食補充體力啦。我自己平時行山會帶麵包,生果或者雞蛋,如果明知道條路我就會帶能量啫喱,因為真係需要補充體力架。

3. 鞋類

雖然無人話過行山就一定要著行山鞋,不過相信好多人著行山鞋都係為安全著想多,相信都係避免扭傷既風險姐。

4. 行山路線

有好多人以為行山呢個運動,估計條條路都差唔多,咁你就大錯特錯啦!除非有人識路帶隊,否則要知道行山路線都有分1星至5星路線架,可以由最簡單既平路至最難既要用人手攀爬都有, 所以出發前一定要做足準備先好行呀!

5. 高度

當你知道呢座山既海拔高度有幾高,你就會知道佢有幾斜同行幾耐先上到頂啦~因為如果閣下平時行幾條樓梯都巳經喘曬氣架話!咁我都唔建議你去行D難度高既山啦~

6. 天氣預報

出發前及活動期間亦應留意天文台的最新天氣消息,以及可能發生的天氣變化等因素。如預知天氣變壞,應及早改變計劃或取消活動。