點解曱甴冇頭都可以生存?

睇古裝片通常要賜死啲人個陣我哋都係話要將個人斬首。人類通過嘴或鼻呼吸,而大腦控制著呢啲關鍵嘅功能,所以當我地冇咗個頭,我哋就唔可以呼吸同進食。啱啱俾隻曱甴差啲嚇死嘅小編係到諗,如果我想拍死隻曱甴個陣淨係打到佢個頭,咁佢會唔會死呢?

曱甴嘅身體結構同人類好唔同。人類嘅神經組織係前端集中,組成我地嘅大腦,呢個現象叫做頭化現象 (cephalization),神經組織集結為形成更複雜的神經系統,令我地成為具有更高自智慧嘅生物。大腦負責收集同理解不同嘅資訊,並向身體唔同嘅地方發出指令。

昆蟲嘅神經系統同人類唔同,雖然曱甴展示出高度嘅頭化現象,佢哋嘅腹部都有一啲叫做神經節(gangalion)嘅組織,呢啲神經節同佢哋嘅腦有相似嘅作用,可以為曱甴執行基本嘅神經功能。曱甴嘅大腦實際上只係控制佢哋嘅觸角同口,所以冇咗個頭嗰陣,佢哋仍然可以倚靠神經節進行其他活動,唔似得人類咁冇咗個頭就進行唔到任何活動。

曱甴並唔似人類需要用肺部控制壓力以進行呼吸。當人類要吸入空氣,橫膈肌同肋間肌收縮並令到肺部裏嘅壓力降低。空氣會由高壓力嘅地方去低壓力嘅地方,我哋可以經由鼻吸入空氣。當我哋要呼出空氣,橫膈肋同肋間機放鬆並增加肺部入面嘅壓力。昆蟲包括曱甴都係使用氣孔呼吸 (圖二)。氣孔位於昆蟲嘅胸腔和腹部,通常每個身體節段有一對氣孔。空氣通過氣孔(spiracle)進入昆蟲的呼吸系統,透過滲透作用,氧氣會從高濃度滲透到低濃度嘅地方。

當曱甴進行呼吸作用(respiration)整能量俾自己嗰陣,佢哋會一直使用氧氣,令到身體嘅氧氣含量比環境更低,亦即係話氧氣會從環境滲透到曱甴嘅體內。進入氣孔之後,空氣會入咗氣管主幹,之後擴散到整個分支氣管導管網絡中,最終到達唔同部位。 即使冇咗個頭,曱甴仍然可以呼吸所以唔會死亡。

但係由於冇咗個口,佢哋唔可以進食或者飲水,係大約一個星期內佢哋就會渴死。

快啲follow InscieInstagram page!
https://www.instagram.com/inscie_hk/

Reference 
Choi, C. (2007). Fact or Fiction?: A Cockroach Can Live without Its Head. Retrieved 30 January 2021, from
https://www.scientificamerican.com/article/fact-or-fiction-cockroach-can-live-without-head/