俾靜電電到傻咁點算?

冬天天氣咁乾燥,隨咗皮膚好乾、口唇爆坼、用多咗skin care産品之外,仲有一樣好煩嘅野就一定係靜電喇!基本上而家隻手掂到邊度,靜電就電到邊度(哭)!不過究竟點解會有靜電,點解冬天又特別多,咁我地又可以點樣避免呢?

點解會有靜電?

我地知道只要將兩件絕緣體互相磨擦嘅時候,就會令到物件積累電荷(電子為主),於物件之中形成靜電。但係其實由公元前600年古希臘時發現靜電,直到今時今日,科學界對絕緣體磨擦嘅時候點解會積累電荷依然未有充分嘅了解。

直至到2019年,一隊嚟自西北大學(Northwestern University)嘅研究團隊發表一份報告,提出一個可靠嘅解釋:

一件物件無論望落幾光滑都好,微觀層面嚟講,因為粒子嘅排列不一唔整齊,所以表面都係凹凹凸凸。當兩件物件互相磨擦嘅時候,凸出黎或者凹入去嘅粒子就會有好大機會會移位。粒子嘅變形會令到粒子産生微量嘅電壓,吸引電荷聚集係粒子之中,從而産生靜電,科學家稱呢個現象為「彎電效應」(flexoelectric effect)。

咁點解冬天特別多靜電?

日常係我地身體會積累嘅靜電大部份都係來自我地嘅身體同衫褲之間嘅磨擦,令靜電積聚係身體,當我地掂到導電體嘅時候,身體上面嘅靜電就會緣住接觸位置流向導電體,而呢個時候就會有所謂電親嘅感覺。

不過我地夏天都會著衫㗎(雖然少啲),咁點解夏天又冇咁多靜電嘅?其實係因為香港冬天都比夏天乾,而乾爽嘅環境就最適合靜電積聚;相反,因為空氣之中嘅濕氣會令空氣變得更加導電,令物件表面嘅電荷更容易經空氣流失。

如何避免靜電!
  1. 避免穿着含有尼龍等合成纖維所製成嘅服飾,因為當中嘅塑膠令身體更容易積聚靜電,專家建議可以多著棉製衣物。
  2. 如果係屋企可以利用增濕器,增加屋企嘅濕度。
  3. 盡可能每隔一段時間接觸金屬,令你身體嘅電荷未積聚到會令你電親,就先經金屬流走。
  4. 如果真係有需要,市面上其實有得買防靜電布、防靜電噴霧、甚至防靜電槍(?)。

快啲Follow我地嘅Instagram Page @Inscie_hk!
https://www.instagram.com/inscie_hk/


文中所提及到嘅知識黎自以下學科:
#靜電學 #Electrostatic

如果想知道更多,可以不妨搜尋下以下字眼:
#靜電 #StaticElectricity

Reference:

Mizzi, C. A, Lin, A. Y. W, & Marks, L. D. (2019). Does Flexoelectricity Drive Triboelectricity? Physical Review Letters, 123(11), Physical review letters, 2019-09, Vol.123 (11).