『行山』應有的注意事項 - 向嵐行山樂

最近呢行山成為咗好多人嘅熱門活動、我相信最主要嘅原因係好多人都想去一啲未去過嘅地方、不過你有冇諗過、其實行山事有幾個注意事項都要大家留意下?今次會同大家分析一下行山應有嘅注意事項啦!因為好多人成日以為行山係一件好容易既事,以為靠兩隻腳行一陣就行到。其實要留意既地方都幾多架!


1.) 天氣如何?

要知道當日行山天氣如何,唔好以為行山天氣一定會係好好,記住唔一定架!最少你都要知道係唔係落緊雨,又或者係唔係打緊風?唔好以為呢D事好少發生!其實每一次打緊八號風球,我地都睇到D新聞話D人懵盛盛,根本唔知打緊八號風球,上到山先至發覺唔對路,最後要打去飛行服務隊求救,仲要上埋電視新聞,你話幾肉酸呀?


2.) 行山路線係易定係難?

近年黎多咗好多人行山帶團,大多數帶開團都係高手(先至聲明,我唔係高手),對呢D帶團既人,行邊對佢地黎講都係容易,如果你問佢易唔易行?咁你就一定問錯人啦,因為有無聽過一個行山高手會話難架?所以你想知道條行山路線係易定係難?最簡單既方法,當然係上網睇曬啲資料先至出發啦!


3.) 行山路線又幾長?

呢個問題都發生好多山友身上。記得曾經係新聞睇個一篇報導,話說有位山友由烏蛟騰出發獨行去黃竹角咀的鬼手岩,因為回程時間太晚,最後係山度過左一晚,但另一半收不到訊息,擔心出事,所以最後報警及由飛行服務隊的直升機救走。其實呢條路最少要行30公里,路途相當之遠,絕對係由天光行到天黑。加上呢位山友承認自己對路線了解不足,咁危險性都幾高下。所以都係個句,想知道行山路線又幾長?大家記得上網睇曬啲資料先至出發啦!


4.) 帶定足夠水份及食物
當你知道條路線有幾長同幾難定易嘅話、咁你就要知道要帶備幾多水同食物出去行山啦。大家要知道山上面唔會有小食店㗎,更加唔會有免費蒸餾水畀你飲,所以你唔帶定足夠嘅水份同食物、辛苦嗰個係自己㗎咋!


5.) 究竟我著普通跑鞋定係著行山鞋去行山好呢?
大家記住一點,普通跑鞋只係真係畀你跑步架咋,行山鞋就當然畀你去行山啦,所以係完全唔同。其實最緊要你行一條乜嘢嘅路、咁你就會著一啲適合嘅鞋去行山架啦。


6.) 唔好為咗打卡做埋啲危險動作
我相信好多人行山都為咗打卡、影一張靚相。不過我個人覺得打卡還打卡、真係唔好做埋啲危險動作、
例如上大東山真係唔好行上啲屋仔,上面、亦唔好為咗打卡去大棠紅葉拉啲樹落黎影相、去犀牛石唔好爬出去影相.…
等等。最緊要大家真係要愛惜環境同埋唔好為咗打卡做埋啲危險動作。


7.) 垃圾自己帶走
呢個問題應該係最嚴重嘅一個,好多人行山咗帶咗好多食物、但亦都帶咗好多垃圾喺山上面、佢哋往往都係隨手就咁就揼喺山上面、咁樣真係會製造好多垃圾、
而且山上面係唔會有人幫你清潔、更加唔好諗住有人會義務幫你清埋啲垃圾。
所以如果你真係有垃圾嘅話,帶多個膠袋、落到山咪可以揼囉


其實所有嘢提早做足準備嘅話、安全就會大啲、意外都會少啲啦。

我講嘅嘢未必啱曬,但係你覺得我可能忽略咗某一啲注意事項、不妨留言啦。