咖啡果皮茶

大家都應該知道咖啡豆係需要經過日曬、水洗或者其他處理法加工而成。無論係邊種加工方法,分離咖啡豆之後剩低左嘅部分都統稱為Cascara - 咖啡果皮。

Cascara對於香港人嚟講可能會比較陌生,但其實好多地方例如西南亞國家也門嘅人飲用咖啡果皮茶嘅歷史比起飲烘焙咖啡更加久遠。 最一開始,當地人會將成粒嘅咖啡果實作為飲用,去到後來先學識將果皮、果肉同粒核分離。直到今日當地仍然保留住飲用乾燥果實或果皮茶嘅傳統。

咖啡果皮茶嘅風味超級獨特!應該冇人會估到佢嘅味道同咖啡完全唔一樣,果皮茶可以熱飲亦都可以冷萃,佢會有啲濃郁嘅水果香氣,而且帶小小甘甜,類似葡萄乾嘅味道 。 當然唔同產地嘅果皮都會有啲唔一樣,例如有啲會有山楂香甜、花香味等等 。

偷偷地話埋比你地知,原來咖啡果皮茶嘅抗氧化元素含量非常高 🤫 咁就可以邊貪靚邊養生咁嘆返杯茶啦~