【影評樂評】幻愛見真情-小塵埃《幻愛》

先講下套戲本身。對於一個住咗大西北24年嘅人嚟講,半年前睇trailer見到由細搭到大嘅輕鐵同成長地出現喺大銀幕,感覺真係好神奇,好有親和力。兩位主角又賞心悅目,故事又好似幾感動咁,嗰陣已經打算入場支持。點知而家套戲變成打卡潮流,又撞正喺疫症低潮時上映,咁就更加冇唔入場嘅理由啦!

無可否認,套戲成功將屯門、舊屋邨、輕鐵站呢啲荒蕪之地拍得好日系,好唯美,是但cap都做到劇照宣傳咁。某啲鏡頭,例如井字公屋景、輕鐵駛過嘅噪音同壓迫感、公屋鐵閘同圍籬監獄似的感覺,都呈現到一份疑幻似真嘅不安氣氛,睇得出團隊做咗好多次實地考察同試位,識得運用場景去帶出情感同氣氛,而非靠後期特效。

唯一問題係⋯劉俊謙實在太靚仔⋯太高大⋯太有型⋯就算特登剪薯仔頭再著uniqlo,佢嘅魅力仍然full晒成個house。高質如此嘅男人,就算有怪病同精神問題,相信唔少女人都哽得落,甚至投懷送抱。咁就令套戲「離地」咗少少,真實感同說服力都低咗兩三分。

講返首歌。我覺得所有劇集或電影主題曲,只要做到一件事就合格,就係聽完會唔會令人諗起電影畫面?會唔會勾返起當中嘅情緒同氣氛出嚟?《幻愛》係做到嘅,由其intro嘅弦樂,一聽就聯想起海浪拍打屯門碼頭嘅寂靜畫面。Johnathan把聲好soft,好啱mood,但直至Pollie喺後尾突襲加入就真係不敢恭維,同男聲好唔夾⋯⋯反正都一人一個version,點解水唔「安份守己」,硬係要featuring幾句呢?

overall我畀套戲7.5分,主題曲6.5分。希望疫情可以盡快收皮,更多人感受阿樂同葉嵐嘅幻愛見真情。