【廣東歌樂評】完全唔稱職嘅一首廢歌-陳健安《廢學》

首歌叫得做「廢」但事實一啲都唔廢,無論歌詞定編曲都係廢都唔廢下,貨不對版!

「眼光停在鏡上 凝視油亮肖像 呼氣向天 看著塵散落頭上」之前忙返工,有街出,屋企有乜擺設,雪櫃啲蛋食晒未,邊條天花線需要修補,sorly地我真係唔知。屋企同酒店一樣,只係自己夜晚嘅容身之所。但呢幾個月唔同講法嚕,小至屋企飲剩幾多紙包飲品,啲牛油果熟未,大至電視邊個台永遠load唔到,我全部都知。所以你話安仔同填詞嘅Oscar有冇搞錯,赤裸裸咁寫晒我呢啲人(失業大軍)嘅生涯出嚟,咁寫實,咁貼地,寫得咁好,一啲都唔廢嘅喂!

喺電腦第一次聽嗰陣,覺得一般,真心少少廢,但之後用headphone聽,發現係完全兩個世界。香港好少呢種lofi feel,所謂study beat嘅編曲,有啲hiphop又有啲jazz又少少pop咁,認真聽個底beat,有啲位斷斷地,kick咗下咁,配埋墊底嘅鋼琴聲同埋effect,好有八九十年代嘅retro feel,有種頹廢同冇厘精神嘅感覺。編曲編得咁好,完全唔貼題!

同埋安仔今次唱得好hea,好慵懶,好似啱啱起身未瞓醒就去咗錄音咁,尾音唱得拖泥帶水,字疊字咁un出嚟。但「轉出廳中播音樂 又跳又唱」呢句突然升key唱,應該係想表達自得其樂,聞歌起舞嘅自high畫面,幾細心,唔係由頭hea到尾。悉心舖排嘅唱法,一啲都唔廢,又係唔貼題嘅!

所以總括講句,首歌一啲都唔廢,仲好好聽,好高分,一啲都唔廢,完全離題,唔該安仔面璧思過⋯⋯

一齊耍廢:https://www.youtube.com/watch?v=VniQwYKEE0c