【廣東歌樂評】焫著夏天嘅EDM-MIRROR《IGNITED》

MIRROR出道就快兩年,但就算計埋今次首新歌都只係得五首作品⋯⋯作為新人,頭一兩年嘅打拼其實好好好重要,一來要鞏固現有fans嘅忠誠度,二來吸路人fans,擴大fans base,令第三年、第四年嘅路易走啲,唔會玩幾年就收皮。更何況MIRROR唔係一般nobody嘅新人,而係未出道就已經人氣爆登,又開埋演唱會嘅超班之子,咁典解要「浪費」呢兩年嘅黃金博殺期,唔乘勢追擊呢?真係諗唔明,有啲可惜。可能你會話:「都難怪嘅,上年就社會事件,今次又肺炎,好多project被逼擱置。」我認同一半啦,但出唔到show,搞唔到演唱會,唔係反而多咗時間專心做歌咩?網上串流時代啵,出唔到碟唔緊要㗎。只要有系統地咁keep住出歌,做足網上宣傳,點都唔會差得去邊。話晒都新一代年輕偶像,唔應該再行傳統嗰套去打歌同谷人氣啦⋯⋯唔係咩?

講返《IGNITED》先,歌詞部分有點令人皺眉頭,可能我個腦污糟啦,我覺得有啲咸濕。一班廿歲出頭嘅後生仔唱住:

「已焫著 其實約不約?」

「明明混帳 非常混帳 但我想 不小心開一槍」

「摸黑探索 怒放心花的竅門」真係好難唔令人諗起嗰啲畫面⋯⋯對於一隊sell形象正面,fans多數係十八廿二嘅組合嚟講,一份咁嘅詞係咪真係最適用呢?我有啲保留。

起初聽到今次編曲係王雙駿之後,期待值即刻+2,但聽完覺得少失望。Carl叔叔編快歌嘅功力一直都無庸置疑,12年前嘅《跑步機上》到而家聽都仲係好特別好新鮮,甚至完勝好多近年嘅所謂快歌。但今次《IGNITED》intro好嘈,中段music break好嘈,當中有啲effect甚至令首歌似「演唱會remix」,即係配合埋舞台效果咁聽同睇就合理囉,但用嚟做派台mix就做多咗。

但overall其實唔差㗎,OK好聽嘅,聽兩次就記得點唱。個feel有啲似當年嘅《La La世界》,係一首擺明想你夏天去沙灘聽同玩嘅歌,但二揀一嘅話,我會選擇聽返前者。

想畀MIRROR焫著嘅:https://www.youtube.com/watch?v=_7jc2nl5C5g&;feature=emb_title