【歐美樂評】正式登陸未來外星球-Lady Gaga《Chromatica》

實在有太多嘢想表達同分享,有啲難organise,所以今篇有啲長,我已經盡cut,如果咁都肯睇晒嘅話,我私人送個小白兔貼紙畀你。

先講豎起手指公嘅位:
1,好開心gaga全面回歸Dance Pop世界,全碟一首ballad都冇!
2,3首弦樂插曲將全碟分成3個chapters,電影感同故事感都高咗好多。fans又唔使一次過硬食16首快歌咁hardcore,有得抖下,唔怕會審美疲勞,二來用弦樂做lead in,感覺都幾新鮮。(唔覺意押咗韻哈哈)
3,全碟overall係好聽嘅,甚至有種愈煲愈好聽嘅感覺,上乘水平,我畀7.3分。

好喇,已經讚完。gaga之前實在太強大,所以我對佢期望唔低,亦知佢絕對可以做得更好!而家講下嗰2.7分扣咗喺邊:
1,gaga話Chromatica係一個「虛擬多元文化同色彩嘅外星球」。但其實就咁聽歌真係分唔到,亦幻想唔到邊首歌等於咩「顏色」,更唔知反映緊咩「文化」。即係例如,《Stupid Love》嘅single cover係桃紅色,咁我就當佢係桃紅色啦。《Rain On Me》講落雨,講眼淚,咁我就當佢係藍色啦。咁⋯⋯喺《Stupid Love》MV出現過嘅黑色、綠色、黃色呢?希望gaga喺Chromatica Ball可以好好present返成個concept出嚟,還返咁多首作品一個膠袋。
2,承上,其中一大分唔到「顏色」嘅原因,係因為某幾首歌實在太似樣,舖排都係:主歌>副歌>music break>主歌>副歌>music break。你可能會話:「吓,pop嘢係咁㗎啦。」但有留意開gaga就知,佢嘅舊作真係遠遠more than that。今次啲編曲的確唔驚喜,甚至仲略嫌太重Bloodpop(今次隻碟嘅main producer)嘅個人色彩,一不留神就會有種聽緊DJ album嘅錯覺。同時整體太側重於「club song」嗰邊,忽略咗gaga拿手嘅實驗性同藝術感。
3,同BLACKPINK嗰首《Sour Candy》簡直係不堪入耳⋯⋯兩個單位把聲唔夾,音樂性低,歌詞冇意思。首歌完全係為炒話題而做,直頭唔擺落碟都唔可惜⋯⋯唯一嘅記憶點係個底好似Katy首《Swish Swish》。
4,某幾首歌嘅intro好怪,甚至可以話冇intro。可能gaga係想大家全碟1 by 1咁聽,歌接歌咁就smooth嘅。但當你想獨立聽某一首,就會明白嗰種「冇頭有尾」嘅奇怪感覺,令人好難投入情緒。Billie上年隻碟喺呢方面就做得好喇,每首歌無論獨立聽定駁住聽都合理嘅,唔會有種格硬chop一截截嘅感覺。

就講完喇,我都知我好長氣,但請容許我將以下幾首佳作貼堂:
《Alice》做track 1 opening好啱,甚至可以話係點題之作。一聽已經feel到嗰種未來同科技感,有種打開序幕,霸氣登場嘅畫面。
《Rain On Me》起初聽覺得還好,而家愈聽愈好聽,甚至係全碟top 1最好聽。期待日後兩位同台表演。
《Babylon》全碟最「跳唔到舞」嘅一首,但喺背景墊底嗰班合唱團和音好搶我耳。聽完前15首電音之後有呢首做甜品,完滿咗成件事。外國網民話呢首係抄Madonna首《Vogue》,但我唔覺啵,起碼我聽咗幾次都聯想唔起,反而我覺得「似」Katy首《Pendulum》多啲。

私心推介《Babylon》:https://www.youtube.com/watch?v=bOuuMmlf_DE