【廣東歌樂評】再一次與RubberBand約會-《First Date》

起初覺得首歌一般,但903呢排日播夜播,聽聽下就覺得好聽咗,又有幾句廢話想講。

仲記得RB出道頭幾年,成日畀人用Mr.嚟比較。兩隊band同期出道,被比較其實都無可厚非,但兩者行嘅路爭天共地,根本冇得比。而嗰陣嘅我,喺呢兩大陣營入面揀咗RB,一來啲歌真係好聽啲,襟聽啲;二來冇Mr.咁商業化同大眾taste。我而家間中都仲會搵返《小涼伴》、《阿波羅》、《Simple Love Song》呢啲作品嚟聽,即使事隔10年,但仍然冇一隊新band「複製」到呢份慵懶嘅感覺畀我。

呢幾年,RB啲歌明顯driven by香港社會,曲色偏激昂、偏熱血,就不太入我耳。短暫離棄咗佢哋兩三年,聽到《First Date》真係有種歸位嘅感覺,嗰份chill到極致嘅vibe返嚟喇!

歌詞好簡單純粹,描述一男一女初次約會嘅尷尬同怕羞。first date只係得一次,亦係最忐忑、甚麼都想甚麼都怯嘅一次。呢份歌詞令我諗起Joey嘅《小日子》,兩首都係講小情侶懶理家門外嘅一切紛擾,好悠然自得。6號唱呢類低調放閃嘅歌好啱數,佢嘅中音同低音係必殺技,唔使用力就唱到溫馨窩心嘅感覺。

唔知有冇人有同感,《First Date》同佢哋10年前嘅《囍宴樂隊》有啲似。甚至覺得前者嘅第1分51秒可以完美駁落後者「場地侍應生努力打掃鮮花佈置傳來幸福味道」嗰段!有時間不妨真係試下咁聽,肯定你會話似。

第N次約會:https://bit.ly/2C3n5i4